ਕੜੀ

ਦੋ ਛਤੀਰਾਂ ਦੇ ਵਿਚਾਲੇ ਪਾਉਣ ਵਾਲੇ ਮੋਟੇ ਟੰਬੇ ਨੂੰ ਕੜੀ ਕਹਿੰਦੇ ਹਨ। ਪਹਿਲੇ ਸਮਿਆਂ ਵਿਚ ਕੁੜੀਆਂ ਉਪਰ ਸਲਵਾੜ ਰੱਖ ਕੇ ਹੀ ਛੱਤ ਪਾਈ ਜਾਂਦੀ ਸੀ। ਕੁੜੀਆਂ ਆਮ ਤੌਰ 'ਤੇ ਥੋੜ੍ਹੀਆਂ ਜਿਹੀਆਂ ਵਿੰਗੀਆਂ ਹੁੰਦੀਆਂ ਸਨ। ਇਸ ਲਈ ਕੁੜੀਆਂ ਵਿਚ ਵਰਗੇ ਲਾਏ ਜਾਂਦੇ ਸਨ। ਵਰਗਾ ਲੱਕੜ ਦੀ ਛੋਟੀ ਜਿਹੀ ਇਕ ਪੱਚਰ ਹੁੰਦੀ ਸੀ ਜੋ ਕੜੀ ਨੂੰ ਛਤੀਰ ਉਪਰ ਪਾਉਣ ਸਮੇਂ ਸਿੱਧੀ ਰੱਖਦੀ ਸੀ। ਪਹਿਲੇ ਸਮਿਆਂ ਵਿਚ ਲੱਕੜ ਆਮ ਹੁੰਦੀ ਸੀ। ਹਰ ਜਿਮੀਂਦਾਰ ਦੇ ਖੇਤ ਵਿਚ ਰੁੱਖ ਹੁੰਦੇ ਸਨ। ਇਸ ਲਈ ਘਰ ਦੇ ਰੁੱਖਾਂ ਦੇ ਹੀ ਛਤੀਰ ਤੇ ਕੁੜੀਆਂ ਬਣ ਜਾਂਦੀਆਂ ਸਨ। ਉਸ ਸਮੇਂ ਲੱਕੜ ਨੂੰ ਚੀਰਨ ਵਾਲੀ ਆਰੀ ਦੀ ਅਜੇ ਕਾਢ ਨਹੀਂ ਨਿਕਲੀ ਸੀ। ਇਸ ਲਈ ਜਿਸ ਤਰ੍ਹਾਂ ਦੀ ਲੱਕੜ ਮਿਲਦੀ ਸੀ, ਉਸ ਨੂੰ ਹੀ ਘੜ ਕੇ ਕੁੜੀਆਂ ਬਣਾ ਲਈਆਂ ਜਾਂਦੀਆਂ ਸਨ।

ਹੁਣ ਤਾਂ ਇੰਜਣਾਂ ਨਾਲ ਤੇ ਬਿਜਲੀ ਨਾਲ ਚੱਲਣ ਵਾਲੇ ਆਰੇ ਹਨ ਜਿਨ੍ਹਾਂ ਨਾਲ ਹਰ ਕਿਸਮ ਦੀ ਲੱਕੜ ਸਿੱਧੀ ਚੀਰੀ ਜਾਂਦੀ ਹੈ। ਇਸ ਲਈ ਹੁਣ ਛੱਤ ਪਾਉਣ ਲਈ ਕੜੀਆਂ ਦੀ ਬਿਲਕੁਲ ਹੀ ਵਰਤੋਂ ਨਹੀਂ ਕੀਤੀ ਜਾਂਦੀ।