ਹੁੱਕੇਬਾਜ਼ੀ

ਇਕ ਬਰਤਨ ਵਿਚ ਪਾਣੀ ਭਰ ਕੇ, ਵਿਚ ਨੇਚਾ (ਹੁੱਕੇ ਦੀ ਨੜੀ) ਪਾ ਕੇ, ਚਿਲਮ ਵਿਚ ਤਮਾਕੂ ਭਰ ਕੇ, ਨੇਚੇ ਉੱਪਰ ਰੱਖ ਕੇ ਜੋ ਤਮਾਕੂ(ਅੱਜ ਕੱਲ ਇਸ ਨੂੰ ਤੁੰਬਾਕੂ ਵੀ ਕਹਿੰਦੇ ਹਨ) ਪੀਤਾ ਜਾਂਦਾ ਹੈ, ਉਸ ਨੂੰ ਹੁੱਕਾ ਕਹਿੰਦੇ ਹਨ। ਗਰੀਬਾਂ ਦੇ ਹੁੱਕੇ ਦੇ ਬਰਤਨ ਮਿੱਟੀ ਦੇ ਹੁੰਦੇ ਸਨ। ਹੁੱਕਾ ਜਿਆਦਾ ਮੁਸਲਮਾਨ ਜਾਤੀ ਵਾਲੇ ਪੀਂਦੇ ਸਨ/ਹਨ। ਮੁਸਲਮਾਨ ਰਾਜਿਆਂ, ਮਹਾਰਾਜਿਆਂ, ਨਵਾਬਾਂ ਤੇ ਅਮੀਰਾਂ ਦੇ ਹੁੱਕੇ ਦੇ ਬਰਤਨ ਸੋਨੇ ਅਤੇ ਚਾਂਦੀ ਦੇ ਹੁੰਦੇ ਸਨ। ਇਨ੍ਹਾਂ ਹੁੱਕਿਆਂ ਦੀਆਂ ਨੜੀਆਂ ਵਿਚ ਹੀਰੇ, ਮੋਤੀ, ਰਤਨ ਜੜੇ ਹੁੰਦੇ ਸਨ। ਅਸਲ ਵਿਚ ਤਮਾਕੂ ਭਾਰਤ ਵਿਚ ਆਇਆ ਹੀ ਜਹਾਂਗੀਰ ਦੇ ਰਾਜ ਸਮੇਂ ਵਿਚ ਹੈ। ਪਹਿਲੇ ਸਮਿਆਂ ਵਿਚ ਹੁੱਕੇ ਦਾਜ ਵਿਚ ਵੀ ਦਿੱਤੇ ਜਾਂਦੇ ਸਨ। ਹੁੱਕਾ ਵਿਅਕਤੀਗਤ ਤੌਰ ਤੇ ਵੀ ਪੀਤਾ ਜਾਂਦਾ ਸੀ/ਹੈ। ਸਮੂਹਿਕ ਤੌਰ ਤੇ ਵੀ ਪੀਤਾ ਜਾਂਦਾ ਸੀ/ਹੈ। ਰੁੱਕ ਦੇ ਪਾਣੀ ਬਦਲਣ ਤੇ ਚਿਲਮ ਵਿਚ ਦੁਬਾਰਾ ਤਮਾਕੂ ਪਾਉਣ ਦੀ ਕਿਰਿਆ ਨੂੰ ਹੁੱਕਾ ਤਾਜਾ ਕਰਨਾ ਕਹਿੰਦੇ ਹਨ। ਜਿਹੜਾ ਬੰਦਾ ਜਿਆਦਾ ਹੁੱਕਾ ਪੀਂਦਾ ਹੋਵੇ, ਉਸ ਨੂੰ ਹੁੱਕੇਬਾਜ਼ ਕਹਿੰਦੇ ਹਨ।ਅੱਜ ਤੋਂ ਕੋਈ 80/90 ਸਾਲ ਪਹਿਲਾਂ ਹੁੱਕਾ ਬਹੁਤ ਜਿਆਦਾ ਪੀਤਾ ਜਾਂਦਾ ਸੀ। ਹੁੱਕਾ ਪੀਣ ਨਾਲ, ਤਮਾਕੂ ਪੀਣ ਨਾਲ ਬਹੁਤ ਸਾਰੀਆਂ ਫੇਫੜਿਆਂ ਦੀਆਂ ਬੀਮਾਰੀਆਂ ਲੱਗਣ ਕਰਕੇ ਹੁਣ ਬਹੁਤ ਹੀ ਘੱਟ ਲੋਕੀ ਹੁੱਕਾ ਪੀਂਦੇ ਹਨ।