ਨੋਵੇਰਾ ਅਹਿਮਦ

ਨੋਵੇਰਾ ਅਹਿਮਦ (29 ਮਾਰਚ 1939 – 6 ਮਈ 2015) ਬੰਗਲਾਦੇਸ਼ ਦੀ ਇੱਕ ਆਧੁਨਿਕ ਮੂਰਤੀਕਾਰ ਸੀ। ਉਸਨੂੰ 1997 ਵਿੱਚ ਬੰਗਲਾਦੇਸ਼ ਸਰਕਾਰ ਦੁਆਰਾ ਏਕੁਸ਼ੇ ਪਦਕ ਨਾਲ ਸਨਮਾਨਿਤ ਕੀਤਾ ਗਿਆ ਸੀ। ਕਲਾਕਾਰ ਜ਼ੈਨੁਲ ਅਬੇਦੀਨ ਨੇ ਉਸਦੇ ਕੰਮ ਬਾਰੇ ਕਿਹਾ, "ਨੋਵੇਰਾ ਹੁਣ ਜੋ ਕਰ ਰਹੀ ਹੈ, ਸਾਨੂੰ ਇਹ ਸਮਝਣ ਵਿੱਚ ਲੰਬਾ ਸਮਾਂ ਲੱਗੇਗਾ - ਉਹ ਇੱਕ ਅਜਿਹੀ ਕਲਾਕਾਰ ਹੈ।"

ਸ਼ੁਰੂਆਤੀ ਜੀਵਨ ਅਤੇ ਸਿੱਖਿਆ

ਅਹਿਮਦ ਦਾ ਜਨਮ 29 ਮਾਰਚ 1939 ਨੂੰ ਉਸ ਸਮੇਂ ਦੇ ਬੰਗਾਲ ਪ੍ਰੈਜ਼ੀਡੈਂਸੀ, ਬ੍ਰਿਟਿਸ਼ ਇੰਡੀਆ ਦੇ ਸੁੰਦਰਬਨ ਵਿੱਚ ਹੋਇਆ ਸੀ। ਉਸਦਾ ਜੱਦੀ ਘਰ ਚਟਗਾਂਵ ਵਿੱਚ ਸੀ। ਉਸਨੇ ਕਲਕੱਤਾ ਅਤੇ ਕੋਮਿਲਾ ਵਿੱਚ ਪੜ੍ਹਾਈ ਕੀਤੀ। 1955 ਵਿੱਚ ਉਸਨੂੰ ਲੰਡਨ ਦੇ ਕੈਮਬਰਵੈਲ ਕਾਲਜ ਆਫ਼ ਆਰਟਸ ਵਲੋਂ ਮਾਡਲਿੰਗ ਅਤੇ ਸਕਲਪਚਰ ਕੋਰਸ ਦੇ ਡਿਜ਼ਾਈਨਿੰਗ ਡਿਪਲੋਮਾ ਨਾਲ ਸਨਮਾਨਿਤ ਕੀਤਾ ਗਿਆ। ਕੈਮਬਰਵੈਲ ਵਿਚ, ਉਸਨੇ ਬ੍ਰਿਟਿਸ਼ ਮੂਰਤੀਕਾਰ ਜੈਕਬ ਐਪਸਟੀਨ ਅਤੇ ਚੈਕੋਸਲੋਵਾਕੀਆ ਦੇ ਕੈਰਲ ਵੋਗਲ ਦੇ ਅਧੀਨ ਅਧਿਐਨ ਕੀਤਾ। 1966 ਵਿੱਚ ਉਹ ਪੈਰਿਸ ਵਿੱਚ ਡੈਨਿਸ਼ ਕਲਾਕਾਰ ਐਸਗਰ ਜੌਰਨ ਨੂੰ ਮਿਲੀ। ਉਸਨੇ ਫਲੋਰੈਂਸ ਅਤੇ ਬਾਅਦ ਵਿੱਚ ਵਿਏਨਾ ਵਿੱਚ ਮੂਰਤੀਕਾਰ ਵੈਨਟੂਰੀਨੋ ਵੈਨਟੂਰੀ ਦੇ ਅਧੀਨ ਯੂਰਪੀਅਨ ਮੂਰਤੀ ਦਾ ਅਧਿਐਨ ਕੀਤਾ। ਉਹ ਬਹੁਤ ਸਾਰੇ ਪੱਛਮੀ ਆਧੁਨਿਕ ਸ਼ਿਲਪਕਾਰਾਂ ਜਿਵੇਂ ਕਿ ਹੈਨਰੀ ਮੂਰ ਤੋਂ ਪ੍ਰਭਾਵਿਤ ਸੀ।

ਕੈਰੀਅਰ

ਅਹਿਮਦ ਨੇ ਢਾਕਾ ਦੇ ਸ਼ਹੀਦ ਮੀਨਾਰ ਦੇ ਮੂਲ ਡਿਜ਼ਾਈਨ 'ਤੇ ਹਮੀਦੁਰ ਰਹਿਮਾਨ ਨਾਲ ਸਾਂਝੇ ਤੌਰ 'ਤੇ ਕੰਮ ਕੀਤਾ। 1956-1960 ਦੌਰਾਨ ਉਸਨੇ ਢਾਕਾ ਵਿੱਚ ਲਗਭਗ 100 ਮੂਰਤੀਆਂ ਬਣਾਈਆਂ ਸਨ। ਉਸ ਦੀਆਂ 100 ਮੂਰਤੀਆਂ ਵਿੱਚੋਂ 33 ਮੂਰਤੀਆਂ ਵਰਤਮਾਨ ਵਿੱਚ ਬੰਗਲਾਦੇਸ਼ ਦੇ ਰਾਸ਼ਟਰੀ ਅਜਾਇਬ ਘਰ ਵਿੱਚ ਹਨ। ਅਹਿਮਦ ਦੀ ਪਹਿਲੀ ਪ੍ਰਦਰਸ਼ਨੀ 1960 ਵਿੱਚ ਢਾਕਾ ਯੂਨੀਵਰਸਿਟੀ ਵਿੱਚ ਲਗਾਈ ਗਈ ਸੀ। ਉਸ ਦੀਆਂ ਰਚਨਾਵਾਂ ਦੀ ਇੱਕ ਹੋਰ ਪ੍ਰਦਰਸ਼ਨੀ 1961 ਵਿੱਚ ਲਾਹੌਰ ਵਿੱਚ ਲਗਾਈ ਗਈ ਸੀ। ਉਸਦੀ ਆਖਰੀ ਪ੍ਰਦਰਸ਼ਨੀ ਵੀ ਜੁਲਾਈ 1973 ਵਿੱਚ ਪੈਰਿਸ ਵਿੱਚ ਲਗਾਈ ਗਈ ਸੀ।