ਕੰਜਰੀ ਨਚਾਉਣਾ

ਪਹਿਲੇ ਸਮਿਆਂ ਵਿਚ ਜਦ ਮੁਟਿਆਰਾਂ ਛੋਪ ਪਾ ਕੇ ਤ੍ਰਿੰਞਣ ਕੱਤਦੀਆਂ ਹੁੰਦੀਆਂ ਉਸ ਸਮੇਂ ਕੰਜਰੀ ਨਚਾਉਣ ਦੀ ਇਕ ਖੇਡ ਵੀ ਖੇਡਦੀਆਂ ਹੁੰਦੀਆਂ ਸਨ। ਜਦ ਪਾਇਆ ਛੋਪ ਸਾਰਾ ਕੱਤਿਆ ਜਾਂਦਾ ਸੀ ਤਾਂ ਕੁੜੀਆਂ ਕੱਤਣ ਤੋਂ ਵਿਹਲੀਆਂ ਹੋ ਜਾਂਦੀਆਂ ਸਨ। ਇਸ ਵਿਹਲ ਦੇ ਸਮੇਂ ਨੂੰ ਹੀ ਮਨੋਰੰਜਨ ਲਈ ਵਰਤਦੇ ਹੋਏ ਇਹ ਖੇਡ ਖੇਡਦੀਆਂ ਸਨ। ਇਕ ਪੂਣੀ ਲਈ ਜਾਂਦੀ ਸੀ।ਪੂਣੀ ਦੇ ਦੋਵੇਂ ਸਿਰਿਆਂ ਨੂੰ ਸਰ੍ਹਾਂ ਦੇ ਤੇਲ ਵਿਚ ਭਿਉਂਤਾ ਜਾਂਦਾ ਸੀ। ਫੇਰ ਦੋਵੇਂ ਸਿਰਿਆਂ ਨੂੰ ਅੱਗ ਲਾਈ ਜਾਂਦੀ ਸੀ। ਫੇਰ ਜਲਦੀ ਪੂਣੀ ਨੂੰ ਉਂਗਲਾਂ ਦੇ ਵਿਚਾਲੇ ਰੱਖ ਕੇ, ਉਂਗਲਾਂ ਨੂੰ ਘੁੰਮਾਉਂਦੇ ਹੋਏ ਇਸੇ ਇਕ ਕੁੜੀ ਵੱਲ ਜਲਦੀ ਪੂਣੀ ਨੂੰ ਸੁੱਟ ਦਿੱਤਾ ਜਾਂਦਾ ਸੀ। ਪੂਣੀ ਦੀ ਇਹ ਖੇਡ ਹੀ ਕੰਜਰੀ ਨਚਾਉਣਾ ਹੁੰਦੀ ਸੀ। ਇਹ ਖੇਡ ਵਾਰ-ਵਾਰ ਖੇਡੀ ਜਾਂਦੀ ਸੀ।

ਹੁਣ ਚਰਖ਼ਾ ਹੀ ਕੋਈ-ਕੋਈ ਮੁਟਿਆਰ ਕੱਤਦੀ ਹੈ। ਤ੍ਰਿੰਞਣ ਤਾਂ ਮੁਟਿਆਰਾਂ ਹੁਣ ਪਾਉਂਦੀਆਂ ਹੀ ਨਹੀਂ। ਇਸ ਲਈ ਕੰਜਰੀ ਨਚਾਉਣ ਦੀ ਖੇਡ ਕੀ ਹੁੰਦੀ ਸੀ, ਅੱਜ ਦੀ ਕੋਈ ਵੀ ਲੜਕੀ ਨਹੀਂ ਜਾਣਦੀ ?