ਦਿਉਣ

ਦਿਉਣ
ਪਿੰਡ
ਦੇਸ਼	India
ਰਾਜ	ਪੰਜਾਬ
ਭਾਸ਼ਾਵਾਂ
• ਸਰਕਾਰੀ	ਪੰਜਾਬੀ (ਗੁਰਮੁਖੀ)
• Regional	ਪੰਜਾਬੀ
ਸਮਾਂ ਖੇਤਰ	ਯੂਟੀਸੀ+5:30 (ਭਾਰਤੀ ਮਿਆਰੀ ਸਮਾਂ)
ਪਿੰਨ ਕੋਡ	151002
ਵਾਹਨ ਰਜਿਸਟ੍ਰੇਸ਼ਨ	PB 03, PB 40
ਨੇੜੇ ਦਾ ਸ਼ਹਿਰ	ਬਠਿੰਡਾ

ਦਿਓਂਣ, ਪੰਜਾਬ ਵਿੱਚ ਬਠਿੰਡੇ ਜ਼ਿਲ੍ਹੇ ਦਾ ਇੱਕ ਪਿੰਡ ਹੈ। ਇਹ ਤਹਿਸੀਲ ਬਠਿੰਡਾ ਦੇ ਅਧੀਨ ਆਉਂਦਾ ਹੈ। ਦਿਉਣ ਬਠਿੰਡਾ ਤੋਂ ਸ੍ਰੀ ਮੁਕਤਸਰ ਸਾਹਿਬ ਸੜਕ ਤੋਂ ਇਕ ਕਿਲੋਮੀਟਰ ਪਿੱਛੇ ਹਟਵਾਂ ਪੱਛਮ ਵਾਲੇ ਪਾਸੇ ਹੈ। ਮਹਿਮਾ ਸਰਜਾ, ਭਗਵਾਨਾ ਮਹਿਮਾ, ਬੁਰਜ ਮਹਿਮਾ, ਬਹਿਮਣ ਦੀਵਾਨਾ, ਬੁਲਾਡੇਵਾਲਾ, ਸਿਵੀਆਂ ਪਿੰਡ ਗੁਆਂਢੀ ਹਨ। ਇਸ ਪਿੰਡ ਦਾ ਮੁੱਢਲਾ ਇਤਿਹਾਸ ਸਿੱਧੂਆਂ-ਬਰਾੜਾਂ ਨਾਲ ਜੁੜਦਾ ਹੈ। ਸਿੱਧੂ ਰਾਵਲ ਜੈਸਲਮੇਰ ਦੇ ਰਾਜੇ ਦੀ ਵੰਸ਼ ਵਿਚੋਂ ਸੀ। ਬਾਬੇ ਸਿੱਧੂ ਦੀ ਦਸਵੀਂ ਪੀੜ੍ਹੀ ਵਿੱਚੋਂ ਬਰਾੜ ਮਹਾਨ ਸੂਰਬੀਰ ਜੰਮਿਆਂ। ਇਸਨੇ ਮੁਸਲਮਾਨ ਭੱਟੀਆਂ ਨਾਲ ਟਾਕਰੇ ਲੈਤੇ ਤੇ ਬਠਿੰਡੇ ਬੀਦੋਵਾਲੀ ਦਾ ਇਲਾਕਾ ਮੱਲਿਆ।

ਰਾਓ ਬਰਾੜ ਦੇ ਦੋ ਮੁੱਖ ਪੁੱਤਰ ਹੋਏ: ਦੁੱਲ ਤੇ ਪੌੜ। ਦੁਲ ਰਾਓ ਦੇ ਚਾਰ ਪੁੱਤਰ ਹੋਏ: ਬਿਨੇਪਾਲ, ਰਤਨਪਾਲ, ਲਖਨਪਾਲ ਤੇ ਸਹਿਨਪਾਲ। ਬਿਨੇਪਾਲ ਦੀ ਵੰਸ਼ ਫਰੀਦਕੋਟ ਦਾ ਰਾਜ-ਘਰਾਣਾ, ਜੈਤੋ ਕੇ, ਚੀਦੇ-ਖਾਨੇ ਕੇ ਤੇ ਰੋਡੇ-ਲੰਡੇ ਵਾਲੇ ਬਰਾੜ ਹਨ। ਰਤਨਪਾਲ ਦੀ ਵੰਸ਼ ਨੌਂਵੀਂ ਪੀੜ੍ਹੀ ਵਿੱਚ ਜੈਦ ਦੇ ਪੁੱਤਰ: ਮਹਿਮਾ, ਅਬਲੂ, ਹਸਨਾ ਤੇ ਮਾਨਕ ਹੋਏ। ਇਹਨਾਂ ਦੀ ਵੰਸ਼ ਮਹਿਮਿਆਂ ਤੇ ਅਬਲੂਕੇ ਪਿੰਡਾਂ ਵਿੱਚ ਵਸਦੀ ਹੈ।

ਇਹਨਾਂ ਦੇ ਜੰਗੀ-ਸ਼ਹੀਦ ਭਰਾ ਲੱਖਨਪਾਲ ਦੀ ਵੰਸ਼ ਦਿਉਣ ਕੇ ਬਰਾੜ ਹਨ। ਲਖਨਪਾਲ ਦੀ ਨੌਵੀਂ ਪੀੜ੍ਹੀ ਵਿੱਚ ਬਾਬਾ ਭੰਗੂ ਹੋਇਆ। ਇਸ ਪਿੰਡ ਦੇ ਮੋਢੀ ਬਾਬਾ ਭੰਗੂ ਦੇ ਦੋ ਪੁੱਤਰ ਦਿਉਣ ਅਤੇ ਜਿਉਣ ਸਨ। ਜਿਓਣ ਬੇ-ਔਲਾਦਾ ਸੀ। ਦਿਉਣ ਦੇ ਚਾਰ ਪੁੱਤਰ ਸਨ: ਮਿਰਜ਼ਾ, ਹਰਦਿੱਤਾ, ਰਾਮ (ਰਾਮੂੰ), ਫਤੂਹੀ (ਰੂਪਾ) ਸਨ। ਪਿੰਡ ਦੀਆਂ ਪੰਜ ਪੱਤੀਆਂ ਹਨ ਜਿਵੇਂ ਮਿਰਜ਼ਾ, ਰਾਮੂੰ, ਹਰਦਿੱਤਾ, ਰੂਪਾ ਪੱਤੀ, ਰਾਊ ਠੁਲਾ ਹਨ।

ਪਿੰਡ ਦਿਉਣ ਵਿਚੋਂ ਬਰਾੜਾਂ ਦੇ ਮੱਲਣ, ਬਾੜਿਆਂਵਾਲੀ, ਭੰਗਵਾਲੀ-ਸੀਰਵਾਲੀ, ਭੰਗਚਿੜੀ ਅਤੇ ਅਬਲ ਖੁਰਾਣਾ ਪਿੰਡ ਬੱਝੇ ਨੇ।

ਲਖਨਪਾਲ ਦੇ ਭਰਾ ਸਹਿਨ ਪਾਲ ਦੀ ਔਲਾਦ ਟਿੱਡੇ ਬਰਾੜ ਹਨ।

ਬਾਬਾ ਸਿੱਧ ਤਿੱਲਕਰਾਓ ਜੀ

ਬਾਬਾ ਸਿੱਧ ਤਿੱਲਕਰਾਓ ਜੀ ਦਾ ਥਾਂ ਦਿਉਣ ਪਿੰਡ ਦੇ ਪੁਰੇ ਵਾਲੇ ਪਾਸੇ ਹੈ। ਇਹਨਾਂ ਦਾ ਇਤਿਹਾਸ ਇਓਂ ਹੈ:

ਸਿੱਧੂ ਰਾਵਲ ਦੇ ਵੱਡੇ ਪੁੱਤਰ ਭੂਰ ਦੇ ਪੁੱਤਰ ਬੀਰ ਦੇ ਦੋ ਪੁਤਰ ਸਨ: ਸੀਤਾ ਰਾਓ ਤੇ ਤਿਲਕ ਰਾਓ। ਸੀਤਾ ਰਾਓ ਮਹਾਨ ਜੋਧਾ ਰਿਹਾ ਅਤੇ ਬਾਬਾ ਸਿੱਧ ਤਿਲਕ ਰਾਓ ਜੀ ਨਿੱਕੀ ਉੰਮਰ ਤੋਂ ਹੀ ਤਪੀਸ਼ਰ ਬਣ ਗਏ। ਇਹਨਾਂ ਦੀ ਭਗਤੀ ਤੇ ਪ੍ਰਸਿਧੀ ਨੂੰ ਵੇਖ ਕੇ ਅਬਲੂ ਪਿੰਡ ਨੇੜੇ ਇਹਨਾਂ ਨੂੰ ਭੱਟੀਆਂ ਨੇ ਸ਼ਹੀਦ ਕਰ ਦਿੱਤਾ ਸੀ। ਸਿੱਧੂਆਂ ਵਿੱਚ ਇਹਨਾਂ ਦੀ ਚੋਖੀ ਮਾਨਤਾ ਹੈ।

ਵੰਸ਼ਾਵਲੀ

ਜੈਸਲ - ਹੇਮਹੇਲ - ਜੂੰਧੜ - ਬਟੇ ਰਾਓ - ਮੰਗਲ ਰਾਓ - ਅਨੰਦ ਰਾਓ - ਖੀਵਾ ਰਾਓ - ਸਿੱਧੂ ਰਾਓ - ਭੂਰ ਰਾਓ - ਬੀਰ ਰਾਓ - ਸੀਤਾ ਰਾਓ - ਜਰਥ ਰਾਓ - ਗਲ੍ਹਤ ਰਾਓ - ਮਹਿਰ ਰਾਓ - ਹਮੀਰ ਰਾਓ - ਰਾਓ ਬਰਾੜ - ਦੁਲ - ਲਖਨਪਾਲ - (9 ਪੀੜ੍ਹੀਆਂ) - ਭੰਗੂ ਬਰਾੜ - ਦਿਉਣ ਬਰਾੜ।

ਸਨਮਾਨਯੋਗ ਸ਼ਖਸਿਅਤਾਂ

ਮੇਜਰ ਜਰਨੈਲ ਸਿੰਘ 1967 ਵਿਚ ਇੰਡੀਅਨ ਆਰਮੀ ਕਮਿਸ਼ਨ ਦੇ ਪਦ ਤੇ ਤਾਇਨਾਤ ਸਨ ਜਿਨ੍ਹਾਂ ਨੂੰ 1968 ਵਿਚ ਆਈ ਐਮ ਏ ਚੋਂ ਗੋਲਡ ਮੈਡਲ ਮਿਲਿਆ,ਡਾ: ਤਰਸੇਮ ਮੋਂਗਾ ਜੋ ਮਸ਼ਹੂ੍ਰ ਸਰਜਨ ਹਨ। ਸੂਬੇਦਾਰ ਹਰਮੇਲ ਸਿੰਘ ਰਾਸ਼ਟਰਪਤੀ ਐਵਾਰਡ ਪ੍ਰਾਪਤ ਹਨ। ਸਾਲ 2013 ਵਿੱਚ ਦੇਸ਼ ਦੀ ਸੇਵਾ ਕਰਦਿਆਂ ਜੰਮੂ ਕਸ਼ਮੀਰ ਵਿੱਚ ਦੇਸ਼ ਦੇ ਦੁਸ਼ਮਣਾਂ ਨਾਲ ਲੋਹਾ ਲੈਂਦਿਆਂ ਪਿੰਡ ਦੇ ਨੌਜਵਾਨ ਲਾਂਸ ਨਾਇਕ ਜਗਦੀਸ਼ ਸਿੰਘ ਸ਼ਹੀਦ ਹੋ ਗਏ ਸਨ। ਗਾਇਕ ਕੁਲਦੀਪ ਮਾਣਕ ਦੀ ਆਵਾਜ਼ ਵਿੱਚ ਇਸ ਪਿੰਡ ਦੇ ਗੀਤਕਾਰ ਅਲਬੇਲ ਬਰਾੜ ਦੀ ਕਲਮ ਵਿੱਚੋਂ ਛੱਡੀਏ ਨਾ ਵੈਰੀ ਨੂੰ, ਕੁੱਖ ਤਾਂ ਸੁਲੱਖਣੀ ਹੋਈ, ਇੱਕ ਵਾਰੀ ਲੰਘਿਆ ਵੇਲਾ ਅਤੇ ਹੋਰ ਵੀ ਸੈਂਕੜੇ ਗੀਤ ਰਿਕਾਰਡ ਹੋ ਚੁੱਕੇ ਹਨ ਗਾਇਕ ਗੀਤਕਾਰ ਇਕਬਾਲ ਪੰਜੂ, ਤਾਰਾ ਬਰਾੜ ਦਿਓਣ, ਨਾਵਲਕਾਰ ਕਾਲਾ ਮੁਟਿਆਰ, ਉੱਘੀ ਕਵਿੱਤਰੀ ਕਰਮਜੀਤ ਕੰਮੋ ਦਿਓਣ ਵਾਸੀ ਹਨ। ਬੀਬੀ ਰਾਜਵਿੰਦਰ ਕੌਰ ਜ਼ਿਲ੍ਹਾ ਪ੍ਰੀਸ਼ਦ ਬਠਿੰਡਾ ਦੀ ਚੇਅਰਪਰਸਨ ਰਹਿ ਚੁੱਕੀ ਹੈ।

ਧਾਰਮਿਕ ਸਥਾਨ

ਪਿੰਡ ਵਿਚ ਛੇ ਗੁਰਦੁਆਰਾ ਸਹਿਬ ,ਬਾਬਾ ਵਿਸ਼ਵਕਰਮਾ ਅਤੇ ਵਾਲਮੀਕ ਮੰਦਰ, ਜੌੜੇ ਪਾਤਸ਼ਾਹ ਦਰਵੇਸ਼ਾਂ ਦੀ ਜਗ੍ਹਾ, ਡੇਰਾ ਬਾਬਾ ਸਿੱਧ ਤਿਲਕ ਰਾਓ, ਡੇਰਾ ਬਾਬਾ ਬਰਮਾ, ਡੇਰਾ ਜਲਾਲ, ਬਾਬਾ ਨਾਥਾ ਦੀਆਂ ਸਮਾਧਾਂ ਮਾਤਾ ਸ਼ੇਰਾਂ ਵਾਲੀ ਦੇ ਮੰਦਿਰ ਹਨ।

ਵਿਦਿਅਕ ਸੰਸਥਾਵਾਂ

ਜ਼ਿਲ੍ਹਾ ਸਿੱਖਿਆ ਅਤੇ ਸਿਖਲਾਈ ਸੰਸਥਾ ਦਿਓਣ ਬਠਿੰਡਾ ,ਫਾਰਮੇਸੀ ਕਾਲਜ, ਮਾਲਵਾ ਕਾਲਜ, ਸੀਨੀਅਰ ਸੈਕੰਡਰੀ ਸਕੂਲ ਦਿਉਣ, ਪੰਜ ਆਂਗਣਵਾੜੀ ਸੈਂਟਰ, ਦੋ ਸਰਕਾਰੀ ਐਲੀਮੈਂਟਰੀ ਅਤੇ ਬਾਬਾ ਫ਼ਰੀਦ ਗਰੁੱਪ ਆਫ਼ ਇੰਸਟੀਚਿਊਸ਼ਨਜ਼ ਵਿਦਿਆ ਦਾ ਗਿਆਨ ਦੇ ਰਹੀਆਂ ਹਨ।

ਖਿਡਾਰੀ

ਸਾਲ 1992 ਚ ਜਗਰੂਪ ਸਿੰਘ ਬਰਾਡ਼ ਇੰਡੀਅਨ ਬਾਸਕਟਬਾਲ ਟੀਮ ਵਿੱਚ ਦਾ ਮੈਂਬਰ ਸੀ। ਕਬੱਡੀ ਖਿਡਾਰੀ ਬਲਜਿੰਦਰ ਬਚੀ ਤੇ ਕੁਲਵਿੰਦਰ ਕਿੰਦਾ, ਸੁਖਦੇਵ ਸੁੱਖਾ, ਜਸਵੀਰ ਬਿੱਲੀ, ਬਲਜੀਤ ਬੀਤਾ ਪਿੰਡ ਦਾ ਨਾਂ ਰੌਸ਼ਨ ਕਰ ਰਹੇ ਹਨ।

ਸਭਿਆਚਾਰਕ ਕਲੱਬ

ਸ਼ਹੀਦ ਭਗਤ ਸਿੰਘ ਯੂਥ ਐਂਡ ਸਪੋਰਟਸ ਕਲੱਬ, ਯੁਵਕ ਸੇਵਾਵਾਂ ਭਲਾਈ ਕਲੱਬ, ਗੁਰਧਿਆਨ ਯਾਦਗਾਰੀ ਫਾਊਂਡੇਸ਼ਨ, ਸ਼ਹੀਦ ਜਗਦੀਸ਼ ਸਿੰਘ ਕਲੱਬ ਅਤੇ ਆਰਮੀ ਵੈੱਲਫੇਅਰ ਐਸੋਸੀਏਸ਼ਨ ਦਿਓਣ ਹਨ।